چوارشەممە بەهۆی سەرماوە لە رۆژهەڵاتی کوردستان پشووە

له‌لایه‌ن: - - به‌روار: 2025-12-31
چوارشەممە بەهۆی سەرماوە لە رۆژهەڵاتی کوردستان پشووە
کوردستان و جیهان

چوارشەممە بەهۆی سەرماوە لە رۆژهەڵاتی کوردستان پشووە

سبەی چوارشەممە لە سەرجەم پارێزگاکانی رۆژهەڵاتی کوردستان بەهۆی سەرماوە پشوو دەبێت. چەند رۆژێکە بارستەهەوایەکی سارد و شەپۆلێکی بەفرباڕین رووی لە رۆژهەڵاتی کوردستان کردووە.

بڕیاری پارێزگای سنە

بەڕێوەبەرایەتیی کۆنترۆڵی قەیرانی پارێزگای سنە ڕایگەیاندووە کە سبەی چوارشەممە 31ی کانوونی یەکەمی 2025، بەهۆی دابەزینی پلەی گەرما و بە مەبەستی کەمکردنەوەی بەکارهێنانی سووتەمەنی و وزە، سەرجەم دامەزراوە حکومییەکان، بانکەکان، قوتابخانە و زانکۆکان دادەخرێن. بەپێی ڕاگەیێندراوەکە، بڕیارەکە دامەزراوە فریاگوزارییەکان، فریاکەوتنی خێرا و بنکە تەندروستییەکان ناگرێتەوە.

پارێزگای ئیلام

هەر بەهۆی سەرما و دابەزینی پلەی گەرماوە، کۆنترۆڵی قەیرانی پارێزگای ئیلام بڕیاریداوە سبەی قوتابخانە، زانکۆ و پەیمانگەکان و دامەزراوە حکومییەکان و بانکەکان دابخرێن. ئەمەش بە مەبەستی کەمکردنەوەی بەکارهێنانی گاز و وزەیە.

پارێزگای ورمێ

لە پارێزگای ورمێش، سبەی جگە لە دامەزراوە خزمەتگوزارییەکان، هەموو دامەزراوە حکومییەکان، زانکۆ، پەیمانگە و قوتابخانەکان و تەنانەت بانکەکانی پارێزگاکەش دەبنە پشوو.

پارێزگای کرماشان

بە بڕیاری بەڕێوەبەرایەتیی کۆنترۆڵی قەیرانی پارێزگاری کرماشان، جگە لە دامەزراوە خزمەتگوزارییەکان، قوتابخانە، زانکۆ، پەیمانگەکان و دامودەزگا حکومییەکان و بانکەکانی پارێزگاکە سبەی داخراو دەبن.

پارێزگای لوڕستان

بەڕێوەبەرایەتیی قەیرانی پارێزگای لوڕستانیش ڕایگەیاندووە کە بە لەبەرچاوگرتنی بەردەوامبوونی بەفرباڕین و دابەزینی پلەی گەرما و بە مەبەستی کەمکردنەوەی بەکارهێنانی سووتەمەنی، سبەی سەرجەم دامەزراوە حکومییەکان، بانکەکان، قوتابخانە و زانکۆکان دادەخرێن.

شەپۆلی بەفرباڕین بەردەوامە

لە ڕۆژی شەممەوە شەپۆلێکی بەفرباڕین ڕۆژهەڵاتی کوردستانی گرتووەتەوە. بەپێی کەشناسیی ئێران، ئەم شەپۆلە تاوەکو ڕۆژی چوارشەممە بەردەوام دەبێت.